جدول تنضيف(معمقنى شكرا ج3)

هتكلم النهاردة على
ادارة البيت
يعنى ايه؟
اقولك
انتى مديرة بيتك ولازم تعرفى ان دى وظيفة حقيقية وليها مسؤليات وعشان تنجح المفروض انك تبقى عارفة مسؤلياتك
طبعا كلنا مسؤلياتنا واحدة وانا حبيت فالجزء دة اتكلم عنها واقسمها
عشان نعرف نحدد الى الى المفروض نعمله عشان منتشتتش ونحتاس

مسؤلياتك
ادارة البيت
ادارة الماليه
ادارة الوقت

ادارة البيت

(تنظيم وتنظيف)

طبعا كلنا عارفين النظام بتاع الروتين اليومى الى قولناه قبل كدة وده هنعمله اولا

ثانيا
طبعا كلنا طالعين مالامتحانات وكان فى غسيل بطاطين والى منكوا غسل السجاد او عاوزة تغسله
وطلوع صيفى ودخول الشتوى
اووووووووووووووو
شييييييييييت
تعب اعصاب والدنيا مبهدلة
على اهمال مننا
معلش كله هيتنظم ويتنضف باذن الله
وهنرجع زى الاول واحسن
طبعا الناس حبايب قلبى الى كانوا معايا فالجروب القديم عارفين نظامى
مبحبش الدلع ولا الحال المايل
فاهمين

وانا عملت جدول اسبوعى ان شاء الله هيبقى شامل كل حاجة فالبيت
معلش هنتعب شوية ونرتاح بعد كدة والى مش عاوزة تتعب
عادى حبيبتى خليكى عايشة فالارف الى انتى فيه مفيش مشكلة
بس انا بقى جربت الارف ولا ممكن اقدر اعيش فيه اكتر من كدة
بهرج طبعا عارفاكوا تموتوا فالنضافةبصى يا موززززة انتى وهى 

نحاول على اد ما نقدر نصحى بدرى وخلى بالك بعد الساعة 8 ص ميعتبرش بدرى للى احنا عاوزين نعمله الحمد لله صحينا الحمد لله الذى احيانا بعد ان اماتنا واليه النشور قومى بقى خدى شاور واتوضى وصلى وتكونى حاطة البراد على البوتوجاز لحد ماتخلصى الصلاة وظبطى الجمجمه وشغلى سورة البقرة وتعالى صبحى علينا عشان ندى بعض جرعة النشاط ونقوم نقوم نعمل ايه بقى اقولك بكرة ان شاء الله الاربعاء وبعده الخميس وطبعا احنا الجمعة مش بنعمل فيه معاميق اليومين دول هنجهز الشقة للمعاميق يعنى الستاير تتشال والسجاد الى محتاج غسيل يتغسل نظبت اى حاجة فالدواليب المهم نستغل اليومين دول ان البيت يكون رايق 
هنحدد كل يوم اوضة وهنخصص ساعة كل يوم
نعمل فيها
ضلفة دولاب
ضلفة نيش
ضلفة مطبخ
نخلص مالدواليب ندخل عالادراجوالاجهزة
كل يوم درج وجهاز

الاسبوع الاول مش هنعمل تحت السراير ولاالنجف ولا الحيطان بالكامل اومال هنعملهم امتى
ان شاء الله فالاسبوع التانى

السبت اوضه النوم

تزعيف
غسيل الشباك اوالبلكونة
فوق الدولاب
تلميع الخشب
تلميع الزجاج والمرايا
الاماكن الى مش نضيفة فالحيطة
الباب
تغيير الملايه
كنس ومسح الارض

الاحد السفرة

تزعيف
غسيل الشباك اوالبلكونة
فوق النيش
تلميع الخشب
تلميع الزجاج والمرايا
الاماكن الى مش نضيفة فالحيطة
الباب
كنس ومسح الارض

الاثنين الصالون
تزعيف
غسيل الشباك اوالبلكونة
غسيل الصالون
تلميع الخشب
الاماكن الى مش نضيفة فالحيطة

الباب
كنس ومسح الارض
باب الشقة
الثلاثاء اوضه القرود

نفس الى اتعمل فاوضة النوم

الاربعاء المطبخ

الشباك
فوق الدواليب
السيراميك
الشفاط
مسح الارض

الخميس الحمام

الشباك
السيراميك
القاعدة
الحوض
البانيو
مسح الارض

ادارة المالية

وده هنتكلم عنه فقسم التوفير والميزانية

ادارة الوقت

كلنا يومنا فى 24 ساعة
فى مننا الى بيستغله صح وفى الى بيضيعه
واكتر حاجة وعن تجربة بتضيع الوقت
النت
الصحيان متاخر
انك متبقيش عارفة ومحددة هتعملى ايه وفوقت اد ايه من قبلها بيوم
والى يحل المشكلة دى النوتة
والى مش عارفة وقتها بيضيع ازاى وفايه
تكتب كل حاجة بتعملها فاليوم والوقت الى خدته فيها اد ايه
بصى بقى وراجعى نفسك واعملى وقفة للحاجات الى بتضيع وقتك
ولازم تعرفى ان يومك لازم يكون فى حاجات مهمة تتعمل مينفعش متتعملش ده لو عاوزة يومك يمشى صح ويبقى يوم مثمر
العباده
تنضيف البيت
العنايه باولادنا وتخصيص وقت للعب معاهم
العناية بنفسك
خلى فيومك وقت لجوزك تعدى معاه وتتكلموا عشان يبقى فى جو الفة ومودة
فى الاخر احب اقولكوا على حاجة مهمة اوى
حاسه انك بعد الجواز تعبتى واتبهدلتى والعيال جم زودوا الطين بله ومطلعين عنيكى وبتشدى فشعرك منهم
لما يجيلك الاحساس ده احمدى ربنا
اه بجد متستغربيش
احمدى ربنا عالنعمة الى ادهالك
فى غيرك بيتمنوها
وافتكرى دايما لما كنتى هتتجننى وتتخطبى ولما اتخطبتى كنتى هتموتى وتتجوزى ويبقالك بيت
ولما اتجوزتى من اول يوم كنتى عاوزة البيريود ماتجيش
وافتكرى لما روحتى تعملى اختبار حمل وانتى قاعدة مستنية الدكتور يقولك فى حمل ولا مفيش
شوفتى انتى اد ايه فنعمة كبيرة اوى